Палестина. Провинция Вифлеем.
Иудейская пустыня.
Иерусалимский Патриархат.
Лавра прп. Саввы Освященного
(Ἱερά Λαύρα τοῦ Ὁσίου Σάββα τοῦ Ἡγιασμένου)

Житье и хоженье Данила Русьскыя земли игумена

О лаврѣ святаго Савы

И от того манастыря [прп. Феодосия Великого – Андрущенко] до лавры святаго Савы есть връстъ 6. Манастыря же та оба на полуденье лиць. Лавра же святаго Савы есть на дебри Асафатовѣ, во Удоли плачевнѣй, яже дебрь отъ Иерусалима поидет; от Гепсимании бо дебрь поидеть сквозѣ лавру и приходить к Содомьскому морю. Лавра же святаго Савы есть уставлена от Бога дивно и несказанно: поток бѣ нѣкако страшенъ и глубокъ зѣло и безъводень, стѣны имя бѣ высоки, и на тѣх стѣнахъ лпять кѣлии прилѣплены и утвержены от Бога нѣкако дивно и страшно. На высотѣ бо той стоятъ келии по обѣма странама потока того страшнаго и лпят на скалах, яко звѣзды на небеси утвержены. Суть же 3 церкви. Посредѣ же кѣлей техъ к западу лиць, ту пещера дивна под скалою каменою, и в той пещерѣ церкви святыя Богородица. И ту пещеру показа Богъ святому Савѣ столпом огненым, преже живущу ему единому в потоцѣ том. И есть же первая келиа святаго Савы, идеже жилъ един, подаль отъ лавры нынѣшняя, яко полверсты вдалѣе. И оттуда показа ему Богъ столпом огненым над мѣстом тѣмь святым, идѣже есть нынѣ лавра святаго Савы. И есть дивно мѣсто и несказанно отнудь. И ту есть гробъ святаго Савы посредиѣ церквий тѣх трий, вдалее отъ великия сажень 4. И есть теремець над гробомъ святаго Савы; учинено красно. Ту же лежат мнози святии отци, телесы яко живи: святый Иоаннъ епископъ Исихастъ ту лежить, святый Иоаннъ Дамаскинъ ту лежит, и святый Феодоръ Едесский ту лежитъ и Михаилъ сыновець его, Афродитианъ святый ту лежит, и инии мнози святии ту лежат, телесы яко живи; и благоухание от них исходить несказанно. И видѣх кладязь святаго Савы, егоже показа ему в нощи осля дикое в потоцѣ том, противу келии его; пихом от кладязя того воду сладку и студену зѣло. В мѣстѣ бо том нигдеже нѣсть рѣки, ни потока, ни кладязя, но токмо един кладязь святаго Савы. Есть бо мѣсто то безводно в горах каменых, и есть путыни та вся суха и безводна, но токмо дъждевою водою живи суть сущии отцы въ пустыни той.